CH News Letter — 25 April 2021

前言

CK一直都諗緊，到底點樣可以提供更加多恒常資訊俾大家。早排一位Follow開嘅YouTuber俾咗少少啟發我，佢會挑選自己認為有趣嘅新聞、專題，拍成影片等一眾車迷緊貼賽車界嘅最新動向。Capital Heights作為一個以價值主導嘅Blog，會透過每星期揀一啲自己會關注嘅報導，希望喺各位創造財富嘅路途上，提供多少幫助。小試牛刀，今個星期先出5篇，反應好嘅CK會再思考點改進整個模式。

Oh right，作為一個生於香港嘅投資經理，我都想借呢個機會為自己嘅文化同語言出一分力，所以News Letter都會以香港話書寫。如果呢個平臺有海外讀者，祈望你哋都能夠體諒CK嘅想法，謝謝！

新聞

（1）對於Starlink，你會感興趣的事！

Figure 1 (Source: Satellitemap.space)

Space Exploration Technologies Corp.（下面簡稱「SpaceX」）由舊年開始，就實行Better than Nothing Beta測試計劃，向合乎資格嘅人仕提供設備。作為一套具備顛覆現有技術潛力嘅系統，部分人對Starlink有好高期望，亦有因唔鍾意Elon Musk表達方式而不分青紅皂白反咗先算嘅存在，咁到底佢最新狀況為何？

Starlink現階段計劃先發射12,000粒人造衛星，分佈喺340到1,150公里嘅軌道，完成之後下階段會再另外部署多30,000粒，覆蓋全球。截至報導出街嗰日，成套系統一共有1,320粒人造衛星運行緊，主要服務範圍喺美國高緯度同加拿大低緯度區域。Starlink年初將目標速度由1Gbps提高到10Gbps，不過測試階段經Reddit網友整理，訊號較好嘅地區下載速度大概係200Mbps、上載就20Mbps、延遲大約15ms。

身處香港、日本呢類通訊發達地區嘅讀者，可能會對呢個速度嗤之以鼻。但係，當年Steve Jobs發表支援WiFi嘅iBook嗰時，速度都只有11Mbps，任何偉大嘅創新，直到建立難以逆轉嘅優勢前，往往都係毫不起眼，不論iPhone、Amazon AWS定Google Search亦如是。Starlink未必會完全取代現有通訊服務供應商，但佢可以帶嚟嘅潛在衝擊，不論你係咪SpaceX嘅前期投資者都應該關注。

Source：TechNews（原文喺呢到）

（2）Sony開發AI幫你打機

Figure 2 (Source: TechNews)

Sony Corp.（股票代碼：SNE）近年積極發展電子遊戲、娛樂等業務，希望能夠分散過去收入過分集中嘅風險。呢間日本消費電子巨頭，近日公佈一份最新AI研究專利，掀示以人工智能技術，學習遊戲風格幫玩家打機嘅想法。

專利文件顯示，AI剛開始嘅時候表現會好似嬰兒咁，但隨住時間推移，佢會模彷玩家嘅習慣，在有需要時就可以交俾AI代勞。試想像一下，未來你打緊Fifa嘅時候要行開一下，都可以AI幫手頂一頂。當然喇，Sony由2019年開始攪AI，歐美日都Set up研究中心，自然唔止想用喺遊戲方面，仲想擴充到影像處理、烹飪，做唔做到Synergy就有待成品再判斷。

Source：TechNews（原文喺呢到）

（3）Snap為Fit Analytics支付1.24億美元

Figure 3 (Source: dot.LA)

Snap Inc.（股票代碼：SNAP）前幾日向美國SEC提交嘅10Q顯示，早前收購柏林Fit Analytics合共涉資1.24億美元，由技術、知識產權、客戶關係、同團隊嘅Payout等部分組成。計埋呢單，舊年Snap一共駛咗超過2億美元進行收購。

呢單交易背後，係Snap為咗喺有限時間內，鞏固用戶黏性，並且將Snapchat每日超過2.8億用戶流量變現嘅最新策略。為咗執行呢套策略，Snap一直招兵買馬，為強化自家電子商貿平臺而努力。有用過Snapchat嘅都知，用戶係可以用Bitmoji創造一個3D Avatar，過去亦曾經同Levi's、Gucci等名牌合作；而舊年收購Ariel AI有望進一步發展呢項特色嘅商業價值。

2020年同Gucci嘅合作，開啟咗利用AR技術，連結消費者同品牌嘅創新模式。收購Fit Analytics，就係Snap喺上一次經驗上面，繼續向消費者市場擴展嘅最新嘗試。

Source：TechCrunch（原文喺呢到）

（4）Alphawave IP準備喺倫敦上市

Figure 4 (Source: Proactive Investors)

半導體行業過去一年都備受全世界投資者關注，Alphawave IP會係最新一間進入公開市場嘅公司。Alphawave IP係一間開發半導體溝通技術嘅企業，市場預期佢嘅技術對5G嘅發展同應用好有幫助。

呢間本身喺多倫多嘅企業，將會搬總部去倫敦，集資5.1億美元，估值推到上45億美元。行政總裁Tony Pialis提到，Alphawave IP選擇英國係因為當地嘅科技、半導體生態圈非常成熟，能夠提供豐富嘅經驗、知識乃至人才。

Source：TechCrunch（原文喺呢到）

評論

（5）SPAC已經成為泡沫了嗎？

Figure 5 (Source: Finerva)

呢兩年SPAC非常火熱，好多名氣大、成長高速、但仍然蝕錢嘅企業，都經過呢條渠道上市。最近市場氣氛轉變，投資者比起之前幾個月，並唔願意為呢堆空投支票公司付出高溢價，結果唔少SPAC都由早輪嘅高峰滑落。房地產平臺Opendoor最新就得返2月嘅一半市值、固態電池開發商QuantumScape更加無咗3/4嘅市值。雖然係咁，唔少經SPAC上市嘅股片價值仍然高過上市嗰時。

對沖基金沽空係呢類SPAC公司下跌嘅原因，著台嘅Virgin Galactic就有較高嘅Short Interest。另外更多嘅SPAC企業排隊上市，電動車、3D打印、自動駕駛等大熱板塊，都令到投資者資源更為分散。據Renaissance Capital嘅資料，今年第1季就有接近300間SPAC喺美國上市。Grab上市之後，仲有更多高價合拼如箭在弦，SPAC嘅熱潮距離完全冷卻仍然甚遠。

Source：Crunchbase（原文喺呢到）

權益申報

筆者現時持有Sony嘅普通股權益。