CH News Letter — Epic借題起革命，SQ之外仲有佢！

前言

早兩星期，我哋曾經提到Apple（AAPL.NASDAQ）同著名遊戲公司Epic Games（下稱「Epic」）之間嘅法律糾紛，當中涉及嘅分成問題，顯然會對Apple、乃至成個產業嘅持份者，如Microsoft（MSFT.NASDAQ）、Sony（SONY.NYSE）等構成打擊。喺訴訟塵埃落定前，CK每星期都會花部分篇幅，同各位跟進最新動態。持有Apple嘅股東，不妨留言話我知你哋有咩更多資訊想知道。

另外，我亦會用一部分嘅篇幅，介紹一啲初創嘅背景同最新動態，希望為大家帶嚟更全面嘅市場資訊。

焦點新聞

（1）Epic v Apple一案更新

Figure 1 (Source: Medium)

訴訟源於舊年Apple將Epic嘅大熱作品Fortnite由AppStore下架，目前剛完成2個星期，重點仍在傳召專家證人，就Smartphones同其他遊戲平臺係咪interchangeable作供。

正方Epic代表，芝加哥大學經濟學教授David Evans話Consoles唔係Smartphones嘅替代品，因為Nintendo（7974.TYO）嘅Switch無得流動上網，其他Consoles直頭帶唔到出街。另外，佢指控Apple唔公平咁隱藏消費者支付30%佣金嘅事實。史丹福商業研究院科技經濟學教授Susan Athey亦提出Apple以鎖定操作系統嘅方式，提高消費者置換成本。

正方代表賓州華頓商學院教授Lorin Hitt反指，Apple並未有限制開發商定價權，並有下調開發成本嘅計劃。另一方面，反競爭個案常見產品質素下降、致使消費者不願買單嘅惡果未有喺Apple生態圈發生；Hitt同時反駁Athey說法了無根據。麻省理工大學經濟學榮休教授Richard Schmalensee表示Apple嘅政策同電子支付平臺無異，且能夠令消費者受惠。

此外，Apple代表律師亦質疑早前作證嘅Microsoft代表—Lori Wright表示Xbox硬件業務持續虧損、及Xbox與iPhone並非競爭產品嘅說法。法官Gonzalez Rogers預期成單訴訟歷時4個星期，而Apple行政總裁Tim Cook好有機會係最為一位被傳召嘅證人。

Source：The Wall Street Journal（原文1） gamesindustry.biz（原文2）

公開市場資訊

（2）美銀下調Android出貨目標

Figure 2 (Source: Google)

Bank of America最新發佈嘅研究報告顯示，5G技術更新，未有如當初預期一般，為Android銷售量帶嚟明顯刺激。包括Xiao Mi（1810.SEHK）、Vivo、Oppo在內嘅主要持份者都已經下調今年第2季出貨目標20%。

值得注意嘅係，以上提及嘅調整主要針對低階Smartphones，呢個市場波動一向較高。今年嚟講，中國市場出現放緩，加上另一主力市場印度深受武漢肺炎（學名「Covid-19」）困擾，都大大打擊一眾中國品牌嘅銷售表現。

Source：TechNews（原文喺呢到）

（3）Amazon搶佔勞動力

Figure 3 (Source: Ecommerce News - Europe)

舊年嘅武肺疫情，令飲食業削減近600萬勞動力。殊不知，經濟逐漸復甦之際，老闆們就發現自己請唔到充足人手。有專家指Amazon（AMZN.NASDAQ）係造成現象嘅罪魁禍首，The New York Times報導呢間科技巨頭2020年每日聘請緊1,400人，今年亦打算多招攬75,000人。

當Amazon倉庫時薪最低達17美金，又有幾多人願意收更低人工，但做一份壓力更大、更辛苦嘅餐飲工作。連銷品牌Chipotle（CMG.NYSE）同McDonald's（MCD.NYSE）都以加薪或者簽約獎金，期望吸引勞動力回巢。但工人仲有互信嘅考慮，對佢哋呼之則來、揮之則去嘅老闆，要解決人手不足嘅難題實在不易。

Source：Insider（原文喺呢到）

（4）Disney訂閱人數不似預期

Figure 4 (Source: Bored Panda)

Disney（DIS.NYSE）公佈財政年度第2季業績，無論收入定串流服務（Disney+）訂閱人數都遜於預期。金融資訊公司FactSet（FDS.NYSE）原先估計，Disney+訂閱人數超過1.09億人，但結果只有令人失望嘅1.04億人。

喺武肺期間，Disney+高速增長一度成長填補公司其他業務下滑嘅良方，公司一再強調佢哋2024年目標係訂閱用戶達2.3億人。平價版Disney+ Hotstar嘅推出，非但未有為訂閱量提速，更加拉低ARPR（Average Revenue per User）至每月3.99美金。Disney亦公佈同MLB以及La Liga嘅新轉播合約細節。

Source：CNBC（原文喺呢到）

本週初創

（5）Stripe，比Space X更值錢嘅獨角獸

Figure 5 (Source: ChartMogul Blog)

由John Collison同Patrick Collison兩兄弟創立嘅電子支付公司Stripe，繼3月以950億美金估值成為美國最大獨角獸外，近日亦動作多多。同Jack Dorsey嘅Square（SQ.NASDAQ）相反，Stripe以一套全方位支付環境，安全、簡單咁執行信用卡、Apple Pay等電子支付方案，令中小企都能夠輕鬆享受電子支付、商貿帶嚟嘅機遇。

目前，Stripe嘅客戶構成極廣，龐大如Slack（WORK.NYSE）、Saleforce.com（CRM.NYSE）都有使用佢嘅服務。僅僅係上個月，Stripe就完成3筆股權投資，而佢未有放慢腳步，剛剛收購Oakland初創Bouncer。Bouncer以新技術進行線上信用卡驗證、辨認被盜用信用卡。Stripe本身已經有自主（唔係「自煮」）研發嘅Stripe Radar，以AI降低欺詐發生嘅機會，融合雙方技術更可減少False Positive嘅發生機會。呢項協同效應，如無意外將鞏固Stripe嘅競爭優勢。

根據Business Insider嘅資料，JP Morgan Chase（JPM.NYSE）旗下嘅Wepay、Alibaba（BABA.NYSE）嘅Alipay、Amazon嘅Affirm都屬於Stripe嘅對手之一。

Source：TechCrunch（原文喺呢到）

精選專題

（6）由C朗代言到從新出發

Figure 6 (Source: The 商業周刊)

開始前問問大家，有無印象C朗拿度（Cristiano Ronaldo）曾經幫間日本品牌代言一系列奇奇怪怪嘅健身產品。係呀，介紹返，呢間嘢叫MTG（7806.TYO），上市前市值超過10億美金，係日本少有嘅獨角獸。

先唔好理嗰件嘢係咪有用，搵完阿朗代言，又確係幾好賣，居然賣咗超過1,000萬部。但有成長無賺頭嘅公司，大家都見唔少，MTG喺2019年上市就爆出分公司造假數，正宗係黃子華講嘅「原來已在下山途中」。話分兩頭，你又唔係iPhone，中國人攞唔到出街威，駛鬼買正版咩。MTG點樣以稻盛和夫提倡嘅「阿米巴經營」扭轉敗局，就交由各位自己搵返嚟睇，呢到想講講另一個點，電商嘅界限。

內文提及，MTG產品單價偏高，往往超過3萬日圓，令消費者卻步。呢方面我哋可以睇到，電商都唔係萬能，愈高額嘅消費，買家愈有親身體驗嘅需求。切身處地咁諗，其實又好合理，你買部iPhone都要去Apple Store玩兩玩先、或者買Burberry（BRBY.LON）嘅Trench Coat都要著上身試試。由呢個角度出發，雖然今日旺角、尖沙咀、銅鑼灣都唔少吉鋪，但一線商場前境未必係唔少財演講到咁慘淡。又咁講，最少Hysan（0014.SEHK）事隔多年，剛剛又投地，準備擴大業務先。

又去返最基本嘅問題，當我哋進行分析時，到底又幾了解、能否代入消費者嘅想法？係咪真係加個Leica紅點上去，部Smartphone就會好賣過iPhone？定人棄我取整部半透明電視扮創新，就可以超越日韓？錯錯錯，一定係搵年過半百嘅年青人偶像做主角，最能夠吸引贊助商！CK講咁多，都係想帶出一個訊息，上市公司、財演有幾可認衰仔，但大家唔能夠俾佢哋嘅語言藝術帶住，保持獨立思考，以市場特性為依歸，建立自己睇法，先可以喺投資呢場長達幾十年嘅比較入面脫穎而出。

Credit：商業周刊第1747期

權益申報

筆者現時持有Apple、Amazon、Microsoft嘅普通股權益。