CH News Letter — Tim Cook作供講啲乜？一鳴下台Tik Tok愁！

前言

Apple（AAPL.NASDAQ）同Epic Games（下稱「Epic」）嘅法律糾紛進入結尾階段，前者嘅行政總裁Tim Cook亦已經完成作供，下面我哋會睇睇第3個星期嘅重點。另外，Snap（SNAP.NYSE）都係今個星期峰會上，公佈點進一步幫合作商戶做生意，陣間都會同大家講講。

適逢全球最大獨角獸ByteDance創辦人張一鳴下課，今期就同大家介紹一下呢間野心勃勃嘅中國企業。

焦點新聞

（1）Epic v Apple進入尾聲

Figure 1 (Source: NoisyLine)

一般預期，5月24號加洲法院會要求雙方完成現有傳召證人階段，並開始為結案做準備。過去3個星期，Apple受到唔少立法者、執法者、以及開發商質疑，指佢哋嘅軟件平臺App Store嚴重限制競爭。唔駛講，Apple自然否認呢種講法，並為自己進行辯護。

簡單以言，Epic指控Apple無理將旗下大熱遊戲Fortnite下架，試圖迫使前者採用App Store嘅電子支付系統，令Apple可以享受30%嘅交易分成；而Apple就辯稱，App Store亦面對其他軟件平臺同硬件嘅競爭，自己就一直致力為客戶提供無縫體驗。

喺庭上，Apple行政總裁Tim Cook作證時，對法官Yvonne Gonzales Rogers嘅提問有以下回應。Cook指Apple嘅電子支付系統面對多方面競爭，同時Apple嘅角色亦唔止係介紹用戶俾軟件開發商，然後就可以坐享其成。App Store有好多免費軟件上架，Apple要為佢哋提供充足流量，整個生態環境先得以維持。同時，Cook亦以市面上嘅五花八門嘅Andorid Smartphones作為例子，反駁Apple無俾選擇消費者嘅講法，強調公司旗艦產品iPhone要確保用戶嘅安全同私隱。Apple一方以iOS收病毒感染嘅機率，僅為Andorid嘅30分之1作為論據。

有趣嘅係，並非所有開發商都對Apple分成政策有怨言。Snap行政總裁Evan Spiegel接受CNBC訪問時，就表示Apple嘅先進產品，係Snapchat取得成功嘅重要基石，所以佢哋樂於接受30%分成乃至iOS 14.5嘅私隱存取權變化。

Source：The Wall Street Journal（原文1） Apple Insider（原文2）

公開市場資訊

（2）Qualcomm認為晶片短缺或者可以喺2021年底解決

Figure 2 (Source: Qualcomm)

今年全球電子產業面對晶片供應緊縮嘅難題，晶片大廠Qualcomm（QCOM.NASDAQ）喺5月20號公佈新一代Snapdragon 7 Series晶片嗰陣表示，短缺不限於個別產品，情況對公司嘅整體成長有利。

佢哋亦強調，Qualcomm嘅市場規模及全球供應鏈，能夠支援供應商嘅產能計劃。喺Qualcomm擁有多重供應來源之下，公司對未來感到樂觀。

Source：TechNews（原文喺呢到）

（3）Snap進一步提升Ecosystem嘅商業能力

Figure 3 (Source: TechCrunch)

Snap日前舉辦嘅峰會之上，發佈咗開發工具更新、專注於AR嘅Lens Studio、及進一步側重銷售體驗。而家，用戶可以使用Snap鏡頭，素描朋友嘅服飾，之後就會推介唔同品牌嘅對應產品；呢個功能亦可以用喺食材之上，簡單拍攝之後Snap就會提供合適嘅食譜。

將流量轉化係Snap嘅一大重點，佢容許唔同品牌設立官立帳戶，俾用戶可以簡單睇到品牌嘅最新產品。Snap同奢侈品牌Farfetch、Prada嘅合作，都會採用最新嘅AR技術，令虛擬試身變得更真實。消費者亦可以透過語音、手勢喺幾件衣服之中轉換比較，獲得如同實體店消費嘅感覺。

Source：TechCrunch（原文喺呢到）

（4）Sony與Kawasaki聯手打造新業務

Figure 4 (Source: cool3c)

Sony（SONY.NYSE）宣佈同Kawasaki Heavy Industry（7012.TYO）合組新公司，起始資本1億日圓。呢間合資企業會善用Kawasaki嘅機械人技術、以及Sony領先全球嘅感光元件、技術科技，打造遙距工作方案，期望可以降低武漢肺炎（學名「Covid-19」）對製造業生產力嘅影響。

將會擔任新公司行政總裁嘅Hirokazu Tanaka喺發佈會就表示，日本面對嘅危機不止於武肺，勞動力因人口老化而減少，對包括製造、物流、同護理等行業都造成打擊。佢相信呢個市場有好大潛力，並打算未來引入更多合作企業，進軍海外市場。

Source：Nikkei Asia（原文喺呢到）

本週初創

（5）失去領頭羊嘅ByteDance？

Figure 5 (Source: Cai Xin Global)

ByteDance係一間成立喺2012年嘅中國資訊科技公司，主要產品包括Tik Tok、Tou Tiao、Vigo Video等。如同好多中國科技企業一樣，以流水作業方式出產大量流動應用。不過，ByteDance或者係歷來第一間，應用程式獲全球追捧嘅中國企業，據流動應用市場研究機構Sensor Tower統計，Tik Tok總下載量已經超越20億次。

舊年8月，前任美國總統特朗普（Donald Trump）曾經簽署行政命令，指示美國Tik Tok業務要喺45日內，由ByteDance旗下分離出嚟，以保障美國國家安全。但經過多輪法律訴訟，商務部嘅各種限制措施都被法庭暫停，銷售予美國企業一事亦不了了之。今年4月，ByteDance傳出將會緊接競爭對手Kuai Shou（1024.SEHK）喺香港上市，估值達4,000億美元，僅次於Tencent（0700.SEHK）及Alibaba（BABA.NYSE）。

但係，創辦人喺ByteDance完成上市之前，就以專注喺更大嘅願景、建構企業文化為由，辭去行政總裁一職。今次將會係繼Kevin Mayer後，1年內ByteDance第2次高層變動，對呢間渴望征服世界嘅中國企業，無疑蒙上陰影。

Source：gamesindustry.biz（原文喺呢到）

精選專題

（6）印度，真係下一個成長引擎？

Figure 6 (Source: The 商業周刊)

隨住中國成長速度放緩，唔少市場人士近日都聚焦印度，大型資產管理公司好似BlackRock（BLK.NYSE）都推出相應嘅主題ETF，俾投資者機會參與呢個市場。但一場世界疫症，令印度跌入危機。呢個人口將會超越中國嘅國家，真係能夠複製後者過去40年嘅成長歷程？

有將生產線帶到印度嘅台商，就歸納出3個重點，或者會拖累呢個人口大國嘅成長速度。第一個係恒之以久嘅種性制度。致使當地人有安身立命嘅想法，缺少動力拼博，何來掘起基礎？第二個因素係家庭觀念，印度人極度重視家庭，同以廠為家嘅中國工人，移動性有明顯落差；第三個係大國心態，自恃市場龐大，對外資進入呈表面開放、實質保守之態勢。

CK多年前有幸去過印度幾日，感覺就係一街都係人，無所事事嘅人。除咗喺觀光景點，例牌會有啲小朋友chur住遊客，賣一啲奇奇怪怪嘅紀念品外，好多人都無嚟工作動力咁。無疑，近年多間科技巨頭聘用印度裔行政總裁，令印度進一步引起各界興趣。然而，成功向上流嘅印度高層，如Microsoft嘅Satya Nedella同Alphabet（GOOG.NASDAQ）嘅Sundar Pichai，本身都屬於地方菁英階層，單單由佢哋嘅成就理解印度大眾係危險嘅。

當然，說到底印度仍然係一個極大嘅市場，各家大企業仍然爭相插旗，與其斬腳趾避沙蟲，倒不如控制好exposure，或者投落已經進入當地嘅公司到，做時間嘅朋友。

Credit：商業周刊第1748期

權益申報

筆者現時持有Apple、Alphabet、Sony嘅普通股權益。